Навоийдаги заводда портлаш юз берди
Ҳодиса оқибатида 11 киши жароҳатланган.
Бугун, 11 март куни Навоий шаҳридаги “Навоиязот” заводининг 25-цех лабораториясида портлаш содир бўлди. Фавқулодда вазиятлар вазирлиги хабарига кўра, ҳодиса натижасида 1 киши ҳалок бўлиб, 11 киши жароҳат олган.
Ёнғин-қутқарув хизматлари тезкор ҳаракат қилиб, ёнғинни соат 14:20 да қуршаб олишга муваффақ бўлди. Соат 14:50 га келиб, олов тўлиқ ўчирилди. Жароҳатланган фуқароларга малакали тиббий ёрдам кўрсатилмоқда.
Портлаш сабаблари ҳозирча расман эълон қилинмаган. Мутасадди ташкилотлар ҳодиса юзасидан терговга қадар суриштирув ишларини бошлаб юборган.
Мазкур воқеа саноат корхоналарида хавфсизлик чораларини янада кучайтириш зарурлигини яна бир бор кўрсатмоқда.
