Путин Украина масаласида муросага келишни истамайди
Россия етакчиси ўз позициясини ўзгартирмоқчи эмас.
Россия Президенти Владимир Путин Украина билан музокараларда ҳудудий талаблар, тинчликпарвар кучлар ва мамлакатнинг бетарафлиги борасида муросага келишдан бош тортмоқда. Бу ҳақида Bloomberg нашри ўз мақоласида хабар берди.
Манбага кўра, Россия етакчиси ўз позициясини ўзгартириш ниятида эмас ва урушнинг тугаш шартлари борасида жиддий ён босишга тайёр эмас. Хусусан, Путин Донетск, Луганск, Херсон ва Запороже вилоятларининг Россия таркибида қолишини қатъий талаб қилмоқда.
Бундан ташқари, Москва Украина ҳудудида тинчликпарвар кучларнинг жойлаштирилишига қатъий қарши чиқмоқда ва Киевнинг бетараф мақомга эга бўлиши шартлигини таъкидламоқда. Ушбу шартлар эса Украина ва Ғарб давлатлари томонидан қабул қилиниши қийин бўлиб, можаронинг давом этиш эҳтимолини оширмоқда.
Ғарб экспертлари Россиянинг бундай қатъий позицияси урушнинг узоқ давом этишига олиб келишини тахмин қилмоқда. Шу билан бирга, Украина президенти Владимир Зеленский Россия билан музокаралар фақат Киев учун мақбул шартлар асосида бўлиши мумкинлигини таъкидлаган.
