Tesla акциялари бир кунда 15 фоизга тушиб кетди

10 март куни Илон Маск раҳбарлик қилаётган Tesla компанияси акциялари 15 фоиздан кўпроқ арзонлашиб, декабрь ойида эришилган барча ютуқларни йўқотди. Доналд Трампнинг 2024 йилги АҚШ президентлиги сайловларидаги ғалабасидан кейин компания акциялари тез ўсишни бошлаган эди, бироқ бу пасайиш Тесланинг бозор қийматига сезиларли таъсир кўрсатди.

 

Декабрь ойи ўрталарида Tesla акциялари 480 долларгача етиб, энг юқори чўққига чиққан эди. Ўшанда бу кўрсаткич Трампнинг сайловолди кампанияси давридаги нархдан икки баравар юқори бўлган. Ҳозир эса акциялар нархи 222 доллар атрофида бўлиб, компаниянинг умумий қиймати 1,5 триллион доллардан 715 миллиард долларга тушиб кетди.

 

Мутахассисларнинг фикрича, бу пасайиш Тесла акцияларининг ҳаддан ташқари ошириб баҳоланганлиги ва инвесторларнинг ишончсизлик кайфиятига тушиб қолиши билан боғлиқ. Шунингдек, бозорнинг умумий ҳолати ва электромобил саноатидаги рақобат кучайиши ҳам компаниянинг акцияларига босим ўтказмоқда.

 

Таққослаш учун, Ford компаниясининг бозор қиймати ҳозирда 40 миллиард доллар, General Motors эса 48 миллиард доллар атрофида баҳоланмоқда. Tesla акцияларининг кескин тушиши инвесторлар орасида келажакда компаниянинг барқарорлиги борасида турли хавотирларни кучайтирди.