Қашқадарёда ноқонуний равишда дарахтлар кесилган
Бош прокуратура мазкур ҳолатни алоҳида назоратга олган.
Қашқадарё вилоятининг Кўкдала тумани, Шўрқудуқ маҳалласи ҳудудида ноқонуний дарахт кесиш ҳолати аниқланди. Вилоят Экология бошқармаси ва ҳуқуқни муҳофаза қилувчи органлар томонидан ўтказилган текширув натижасида фуқаро Н. Оқмирзаев томонидан 103 туп «кўктол» дарахти бутунлай кесиб ташлангани маълум бўлди.
Бош прокуратура ҳолат бўйича Жиноят кодексининг 198-моддаси 2-қисми (экинзорларни, дарахтларни ёки бошқа ўсимликларни шикастлантириш ёхуд нобуд қилиш) асосида жиноят иши қўзғатган. Иш материаллари туман ИИБга тергов учун юборилган.
