Форс кўрфазида “қонли ёмғир” ҳодисаси кузатилди
Ҳодиса оролдаги гелак тупроғи билан боғлиқ.
Форс кўрфазидаги сайёҳлар ноёб табиий ҳодисага гувоҳ бўлишди. Кучли ёмғирдан сўнг, Эрондаги Ҳормуз оролининг қирғоқ чизиғи ёрқин қизил рангга айланди. Ижтимоий тармоқларда “қонли ёмғир” акс этган видеолар кенг тарқалиб, пляж бўйлаб оқаётган қизил сув оқимлари барчани ҳайратга солди.
Мутахассисларнинг фикрига кўра, бу ҳодиса оролда кўп миқдорда темир оксидини ўз ичига олган гелак тупроғи билан боғлиқ. Ёмғир суви қизил рангдаги тупроқ билан аралашган ҳолда қирғоқ бўйлаб оқиб, ғайриоддий манзарани юзага келтирган. Қуруқ об-ҳавода эса бу тупроқ, айниқса қуёш ботиши ёки чиқиши вақтида янада ёрқинроқ товланади.
Ҳормуз ороли 70 дан ортиқ фойдали қазилмалар мавжудлиги сабабли “Камалак ороли” деб ҳам аталади. Унинг Кумуш ва Қизил пляжларида кузатилган ушбу ҳодиса сайёҳларни ҳайратга солиб, кўплаб сурат ва видеоларнинг тарқалишига сабаб бўлди.
