Қишлоқ хўжалигидаги хавфларни суғурталаш тизими такомиллаштирилмоқда
Табиий офатлар оқибатида етказилган зарарлар энди суғурта билан қопланади.
Ўзбекистон қишлоқ хўжалиги соҳасидаги хавфларни камайтириш ва фермерларнинг молиявий барқарорлигини таъминлаш мақсадида Қишлоқ хўжалиги суғуртаси жамғармаси ташкил этилади.
Сенатнинг ялпи мажлисида муҳокама қилинган ва маъқулланган “Қишлоқ хўжалиги таваккалчиларини суғурта қилиш тўғрисида”ги қонун доирасида давлат томонидан фермерларга молиявий ёрдам кўрсатиш механизми ишлаб чиқилди.
Янги тартибга кўра, қишлоқ хўжалиги суғурта мукофотининг 50 фоизини давлат қоплайди. Бундан ташқари, суғурталанган хўжаликлар табиий офатлар ёки бошқа хавфлар натижасида зарар кўрса, жамғарма маблағлари етарли бўлмаса, қолган қисми республика буджети ҳисобидан қопланади.
Ушбу ташаббус иқлим ўзгариши, табиий офатлар, зараркунандалар ва бозор шароитидаги ўзгаришлар туфайли юзага келадиган молиявий йўқотишларнинг олдини олишга хизмат қилади. Шунингдек, ҳосилга етказилган зарарни баҳолаш ва суғурта ҳодисалари бўйича компенсацияни мустақил экспертлар белгилаши ҳам назарда тутилмоқда.
Қонун сенаторлар томонидан маъқулланди ва тез орада амалиётга жорий этилиши кутилмоқда.
