Тошкентда фирибгарлар гуруҳи қўлга олинди
Улар 15 мингдан ортиқ кишининг шахсий маълумотларини ўғирлаган.
Тошкент шаҳрида фуқароларнинг шахсий маълумотлари ва пластик карталаридаги маблағларни қўлга киритиш билан шуғулланган йирик Салл-марказ фаолиятига чек қўйилди.
Тошкент шаҳар Ички ишлар бош бошқармаси Ахборот технологиялари соҳасида жиноятчиликка қарши кураш бошқармаси ҳамда Давлат хавфсизлик хизмати ходимлари ҳамкорлигида ўтказилган тезкор тадбирлар натижасида Мирзо Улуғбек туманида жойлашган уйда яширин фаолият олиб борган жиноий гуруҳ фош этилди.
Улар фуқароларга сохта қўнғироқлар орқали мурожаат қилиб, турли ёлғон маълумотлар асосида уларнинг шахсий маълумотлари ва маблағларини қўлга киритиш билан шуғулланган.
Текширув давомида жиноий гуруҳ таркибида икки нафар ташкилотчи ва 20 га яқин оператор борлиги аниқланди.
Шунингдек, 15 мингдан ортиқ кишининг шахсий маълумотлари, гиёҳвандлик моддалари, 35 дона уяли телефон, 10 дан ортиқ пластик карта ашёвий далил сифатида мусодара қилинди.
Мазкур ҳолат юзасидан Жиноят кодексининг 278-4-моддаси (Компьютер ахборотини модификациялаш) бўйича жиноят иши қўзғатилиб, гумонланувчилар қамоққа олинди.
Ҳозирда тергов ишлари давом этмоқда.
