Араб хурмосининг инсон организмига фойдалари
Хурмо юрак, мия ва суяклар учун энг фойдали мевалардан биридир.
Араб хурмоси – дунёнинг турли тропик минтақаларида ўстириладиган мазали ва фойдали мева бўлиб, кўпинча қуритилган ҳолда истеъмол қилинади. У ўзининг бой витамин ва минерал таркиби билан ажралиб туради.
Хурмо углеводларга энг бой мевалардан бири бўлиб, уларнинг миқдори 60 фоиздан ошади. Бироқ, таркибидаги ниатсин, рибофлавин ва пантотеник кислоталар углеводларни ҳазм қилишни осонлаштиради ва қондаги глюкоза миқдорини тартибга солади. Шунингдек, хурмо таркибида организм учун зарур бўлган 23 хил аминокислоталар мавжуд.
100 грамм хурмо қуйидаги озуқавий моддаларга эга:
- Калория – 277 ккал
- Углеводлар – 75 г
- Эляф (клетчатка) – 7 г
- Протеин – 2 г
- Калий – РДИ нинг 20 фоиз
- Магний – РДИ нинг 14 фоиз
- Мис – РДИ нинг 18 фоиз
- Марганец – РДИ нинг 15 фоиз
- Темир – РДИ нинг 5 фоиз
- Витамин Б6 – РДИ нинг 12 фоиз
Хурмонинг соғлиқ учун фойдалари
1. Юрак ва қон томир тизимига фойдаси
Хурмодаги калий танадан натрийни чиқариб, қон босимини меъёрда ушлаб туришга ёрдам беради. Эляф миқдори юқори бўлгани учун у холестерин даражасини пасайтириб, юрак-қон томир касалликлари хавфини камайтиради.
2. Овқат ҳазм қилиш тизимини яхшилайди
Хурмо таркибидаги клетчаткалар овқат ҳазм қилиш жараёнини яхшилайди, қабзиятнинг олдини олади ва қондаги қанд миқдорини назорат қилади.
3. Кучли антиоксидант манбаи
Араб хурмоси антиоксидантларга бой бўлиб, улар организмни эркин радикаллардан ҳимоя қилади ва яллиғланиш жараёнларини камайтиради. Энг муҳим антиоксидантлари:
- Флавоноидлар – яллиғланиш, Алсгеймер ва айрим саратон турларининг хавфини камайтиради.
- Каротеноидлар – юрак ва қон томирларини ҳимоя қилади.
- Фенолик кислота – саратон ва юрак касалликлари хавфини пасайтиради.
4. Мия фаолиятини яхшилайди
Тадқиқотлар шуни кўрсатадики, хурмо Алсгеймер касаллигининг олдини олишга ёрдам беради. У мия ҳужайралари орасидаги алоқани бузадиган бляшка ҳосил бўлишини камайтириб, хотира ва ўрганиш қобилиятини яхшилайди.
5. Табиий энергия манбаи
Хурмо табиий шакар – фруктоза манбаи бўлиб, энергияни тез тиклашга ёрдам беради. Уни оқ шакар ўрнида истеъмол қилиш мумкин.
6. Суяк саломатлиги учун фойдали
Хурмо таркибида фосфор, кальций, магний ва калий бўлиб, улар суякларнинг мустаҳкамлигини таъминлайди ва остеопорознинг олдини олади.
Кунига 2-3 дона хурмо истеъмол қилиш орқали: суяк саломатлигини яхшилаш, юрак-қон томир касалликларининг олдини олиш, овқат ҳазм қилишни яхшилаш, хотира ва мия фаолиятини қўллаб-қувватлаш, ёшроқ кўриниш ва иммунитетни мустаҳкамлаш мумкин.
Араб хурмоси – табиий ширинлик бўлиб, у организм учун муҳим витамин ва минералларни ўз ичига олади. Уни меъёрида истеъмол қилиш орқали кўплаб касалликларнинг олдини олиш ва умумий саломатликни мустаҳкамлаш мумкин.
