Ижтимоий тармоқларнинг руҳий саломатликка хавфи аниқланди
Руҳий касалликларнинг кучайишига ижтимоий тармоқлар сабаб бўлиши мумкин.
Канадалик олимлар ижтимоий тармоқлардан фаол фойдаланиш руҳий касалликлар, жумладан, нарсисизм, дисморфофобия, овқатланиш бузилиши, шизофрения ва биполяр бузилиш белгиларини кучайтириши мумкинлигини аниқлади.
Тадқиқотчилар 2004–2022 йилларда чоп этилган 155 та илмий мақолани таҳлил қилиб, ижтимоий тармоқларнинг “хаёлий ғояларни кучайтирувчи” муҳит яратишини таъкидладилар. Масалан, нарсиссистик шахслар ёқтиришлар ва издошлар орқали ўзини тасдиқлашга интилади, дисморфофобияга чалинганлар эса ўз танасини бошқалар билан солиштириш орқали ўзига бўлган ишончини йўқотади.
Шизофрения билан оғриган одамларда эса паранойя ва алданиш ҳисси ортиши мумкин. Олимларнинг фикрича, ижтимоий тармоқлар бевосита руҳий касалликларга сабаб бўлиши исботланмаган, аммо уларнинг салбий таъсири яққол сезилмоқда.
