Эрталаб нонушта қилмасликнинг зарарлари аниқланди
Бу одат юрак касалликлари ва ортиқча вазн хавфини оширади
Мутахассислар эрталаб нонушта қилмаслик метаболик синдром, 2-тоифа қандли диабет ва артериал гипертония каби касалликларнинг ривожланишига сабаб бўлиши мумкинлигини таъкидламоқда. Метаболик синдром тана вазнининг ортиши, юқори холестерин, қон босими ошиши ва инсулинга сезгирликнинг пасайиши билан кечади. Ушбу ҳолат умр давомийлигининг қисқаришига ҳамда соғлиқ сифатининг ёмонлашишига олиб келиши мумкин.
Испанияда ўтказилган уч йиллик тадқиқот натижаларига кўра, тўйимли нонушта қилган кишилар нонушта ўтказиб юборганларга қараганда камроқ тана ёғига эга бўлишган. Камида 400 калория истеъмол қилган одамларнинг тана массаси индекси пастроқ бўлиб, бел соҳасида ортиқча ёғ камроқ тўпланган.
Нью-Йорк университети олимлари эса 40 ёшдан ошган 34 минг кишини узоқ йиллар кузатиб, эрта нонушта қилганларда юрак касалликлари ва саратон хавфи 6 фоизга камроқ эканлигини аниқлаган.
Нонуштанинг муҳим фойдалари:
Метаболизмни тезлаштиради – танадаги моддалар алмашинувини фаоллаштириб, ортиқча вазн ортишининг олдини олади.
Қандли диабет ва юрак касалликлари хавфини камайтиради – қондаги шакар ва холестерин даражасини мувозанатлашга ёрдам беради.
Энергия ва диққатни оширади – тўғри тақсимланган эрталабки овқат энергия беради ва кун давомида тетик бўлишни таъминлайди.
Олимларнинг таъкидлашича, соғлиқни сақлаш ва метаболик синдромнинг олдини олиш учун нонушта қилиш одатини 40-50 ёшдан аввал шакллантириш мақсадга мувофиқ.
