Олимлар мушукларнинг инсон саломатлигига ижобий таъсирини аниқлади

 

Ҳайвон терапияси инсон руҳияти ва ҳиссий ҳолатини яхшилашда самарали восита сифатида кенг қўлланилади. Одатда, бу мақсадда итлар ва отлар танланади. Аммо Вашингтон штат университети олимлари олиб борган янги тадқиқот натижаларига кўра, мушуклар ҳам стрессни камайтиришда муҳим роль ўйнаши мумкин.

 

Тадқиқотчилар юзлаб мушук эгалари ўртасида сўров ўтказиб, уларнинг уй ҳайвонлари хатти-ҳаракатларини баҳолашди. Натижалар шуни кўрсатдики, баъзи мушуклар одамларга тинчлик ва хотиржамлик бағишлашда жуда фойдали бўлиши мумкин.

 

Улар:

• Одамлар билан яқин мулоқот қилишни ёқтирадилар;
• Эътибор ва меҳр излашади;
• Осонлик билан янги муҳитга мослашадилар.

 

Тадқиқот раҳбари Патрисия Пендрининг таъкидлашича, баъзи одамлар кучли ижтимоий фаолликка эга бўлган итлардан кўра мушукларнинг осойишта ва юмшоқ феъл-атворини афзал кўради. Шу сабабли, мушук терапияси кўпроқ инсонларга мос келиши мумкин.

 

Фарқли жиҳатлардан яна бири шундаки, мушуклар махсус тайёргарликдан ўтмайди. Уларнинг терапевтик хусусиятлари асосан индивидуал феъл-атвор ва инсон билан ўзаро алоқасига боғлиқ бўлади.

 

Олимлар мушукларнинг стресс, ташвиш ва депрессияни камайтиришдаги ролини янада чуқурроқ ўрганишни режалаштирмоқда. Бу эса келажакда фелинотерапиянинг расмий терапия шаклига айланишига олиб келиши мумкин.