Марказий банк томонидан 5 та банк жаримага тортилди
Яна 3 тасига огоҳлантириш берилди.
Ўзбекистон Марказий банки февраль ойида ўтказилган йиғилишлар давомида 5 та банкка жарима, 3 та банкка эса огоҳлантириш берди. Бу ҳақда Марказий банк матбуот хизмати хабар берди.
Февраль ойида Банк назорати қўмитаси жами 8 та йиғилиш ўтказиб, 43 та масала бўйича тегишли қарорлар қабул қилган.
Улар орасида:
- Кредит ташкилотлари уставига ўзгартириш киритиш – 8 та ҳолат
- Янги микромолия ташкилотларини рўйхатдан ўтказиш – 3 та
- Устав фондидаги улушга эгалик қилиш учун рухсат бериш – 5 та
- Ваколатхона очиш бўйича қарор қабул қилиш – 1 та
- Банклар кузатув кенгаши ва бошқарув аъзоларининг номзодларини кўриб чиқиш – 13 та
Бундан ташқари, "Ишонч Плус Ҳамкор" микромолия ташкилоти давлат реестридан чиқарилди, чунки унинг таъсисчилари уни тугатиш ҳақида қарор қабул қилган.
Шунингдек, 12 та банкнинг молиявий ҳолати таҳлил қилиниб, 3 тасига иқтисодий меъёрларга риоя қилмагани сабабли огоҳлантириш берилди. 5 та банк эса инспекция текширувлари давомида аниқланган қонунбузарликлар учун жаримага тортилди.
