Қашқадарёда 9 нафар ИИБ ходими ишдан олинди
Бир гуруҳ ходимларга интизомий жазолар қўлланди.
Ички ишлар вазири Азиз Тошпўлатов Қашқадарё вилоятида комплекс инспекторлик текшируви натижалари юзасидан ҳисобот йиғилиши ўтказди. Йиғилишда соҳавий хизматлар ва ҳудудий ИИБ раҳбарлари фаолиятида жиддий камчиликлар аниқланди ва шу асосда чоралар кўрилди.
Хусусан, вилоят ИИБ Маънавий-маърифий ишлар ва кадрлар билан таъминлаш хизмати бошлиғининг ўринбосари, вилоят ЙҲХХ бошлиғининг Маънавий-маърифий ишлар бўйича ўринбосари, Рўйхатдан ўтказиш ва имтиҳон олиш бўлими бошлиғи, Кўкдала ва Китоб туманлари ИИБ бошлиқлари, Косон ва Касби туманлари ИИБ бошлиқларининг биринчи ўринбосарлари, Муборак тумани ва Қарши шаҳри ИИБ жамоат хавфсизлиги хизмати бўйича ўринбосарлари лавозимларидан озод этилди.
Шунингдек, вилоят ИИБ бошлиғининг жамоат хавфсизлиги бўйича ўринбосари, Тергов бошқармаси бошлиғи, жамоат тартибини сақлаш бошқармаси бошлиғи, йўл ҳаракати хавфсизлиги қидирув-суриштирув бўлинмаси бошлиғи ва бошқа бошлиқларга кескин интизомий жазолар қўлланди. Йиғилишда ички ишлар органлари раҳбарларининг шахсий жавобгарлигини ошириш ва хизмат интизоми ҳамда қонунчилик талабларига қатъий риоя этилишини таъминлашга қаратилган чоралар муҳокама қилинди.
