Андижонда ўқувчиларга шубҳали конфет тарқатиляптими?
Тармоқда тарқалган хабарларга изоҳ берилди.
Ижтимоий тармоқда Андижон вилоятининг Олтинкўл туманидаги мактабда ўқувчиларга номаълум таркибдаги конфет тарқатилаётгани ҳақида хабар тарқалди.
ИИВ томонидан аниқланишича, Олтинкўл туманидаги мактабнинг 3-синф ўқувчиси X.M. мазкур ҳудудда жойлашган савдо дўконидан минг сўмга 3 дона конфет сотиб олган. Шундан сўнг мактабга келган вақтида синфдоши O.A. ундан ширинликни қаердан олганлигини сўраганда, гўёки нотаниш шахс бериб кетганлигини ўйлаб топиб ёлғон айтган.
Мактаб ҳамшираси O.A. болани гапидан хулоса қилиб, ижтимоий тармоқларга мактаб атрофида шубҳали конфетни мактаб ўқувчиларига номаълум шахслар берганлиги ҳақидаги ҳаққоний бўлмаган хабарни тарқатган.
“Шунингдек, конфет истеъмоли оқибатида бола нобуд бўлганлиги тўғрисидаги хабар ҳам мутлақо ҳақиқатга зиддир”, дейилади xabarda.
Ҳозирда мазкур ҳолат юзасидан терговга қадар текширув олиб борилмоқда, конфетнинг таркибида инсон соғлиғига зарарли моддалар бор ёки йўқлигини аниқлаш мақсадида суд-кимёвий экспертиза тайинланган.
