Сирдарё ва Навоийда ишга юборишни ваъда қилган фирибгарлар ушланди
Улар АҚШга ишга жойлаштиришни ваъда қилишган.
Сирдарё ва Навоий вилоятларида фуқароларни АҚШга ишга юборишни ваъда қилиб, улардан йирик миқдорда пул олган шахслар қўлга олинди.
Бош прокуратура ҳузуридаги Департаментнинг Ширин шаҳри бўлими ва ДХХ ходимлари ҳамкорлигида ўтказилган тезкор тадбирда фуқаро F.R. M.X.ning ишончига кириб, ўзи ва танишини 38 000 АҚШ доллари эвазига АҚШга ишга юбориши ва виза олиб беришини айтган. У келишилган пулнинг 52 миллион сўмини олаётган вақтида ашёвий далиллар билан қўлга олинган.
Шунингдек, Департаментнинг Навоий шаҳри бўлими, ДХХ ва ИИБ ходимлари томонидан ўтказилган операцияда илгари фирибгарлик учун судланган фуқаро M.A. фуқаро L.Q.ni Мексика орқали АҚШга ишга юборишни ваъда қилиб, ундан 14 000 АҚШ доллари олган вақтида ушланди.
Мазкур ҳолатлар юзасидан Жиноят кодексининг 25, 168-моддаси (фирибгарлик) билан жиноят ишлари қўзғатилиб, тергов ҳаракатлари олиб борилмоқда.
