Макрон Украинага 2 миллиард евро ҳарбий ёрдам ажратади
Бугун Парижда Украина қуролли кучларининг келажаги муҳокама қилинади.
Кеча, 26 март куни Франция президенти Эммануел Макрон Парижда Украина президенти Владимир Зеленский билан учрашди. Учрашув давомида Макрон Украинага яна 2 миллиард евро ҳарбий ёрдам ажратишини эълон қилди.
Янги ёрдам пакети Милан танкка қарши ракеталари, MISA ракеталари, Mistral зенит ракеталари, бронетехника, ўқ-дорилар ва дронларни ўз ичига олади. Макрон бугун, 27 март куни Парижда бўлиб ўтадиган саммитда Украина қуролли кучларининг келажакдаги формати муҳокама қилинишини таъкидлади.
Зеленский эса ўз нутқида АҚШнинг можарони тинч йўл билан ҳал қилишига умид билдирганини айтди. Унинг сўзларига кўра, Саудия Арабистонида АҚШ билан бир неча бор музокаралар ўтказилган ва натижада Украина зарурий ёрдам ҳамда разведка маълумотларини олган.
