Сурия собиқ бош муфтийси аэропортда қўлга олинди
У мамлакатдан Уммонга қочишга уринган.
Сурия хавфсизлик кучлари Дамашқ халқаро аэропортида собиқ бош муфтий шайх Аҳмад Бадриддин Ҳассунни ҳибсга олди. У мамлакатдан Уммонга қочишга уринган ва у ерда шошилинч жарроҳлик амалиётини ўтказиши керак бўлган. Бироқ аэропортга келганидан бир неча дақиқа ўтиб, қўлга олинган.
Дамашқда яшириниб юрган Башар Асад тарафдорларига қарши махсус операциялар давом этмоқда. Хавфсизлик кучлари томонидан ўтказилган рейдларда бир неча киши ушланган, улардан қуроллар, ўқ-дорилар ва портловчи қурилмалар топилган. Март ойида Латакия, Тартус, Хама ва Хомс вилоятларида Асад тарафдорлари ва янги ҳукумат ўртасида қуролли тўқнашувлар содир бўлиб, 1,3 мингдан ортиқ одам ҳалок бўлган.
Суриянинг янги ҳукумати Асадни суд қилиш учун Россиядан уни экстрадиция қилишни талаб қилмоқда. Бироқ Россия ҳозирча бу талабни рад этмоқда. Шу билан бирга, Латакия ва Идлиб вилоятлари чегарасида ўтказилган операцияда Асад тарафдорларидан 15 та аскар қўлга олингани маълум қилинди.
