Тошкент ва Қорақалпоғистонда коррупция ҳолатлари аниқланди
Мактаб ва боғча мутасаддиларининг ноқонуний ҳаракатлари фош бўлди.
Давлат хавфсизлик хизматининг (ДХХ) Тошкент шаҳри бўйича бошқармаси ходимлари томонидан Иқтисодий жиноятларга қарши курашиш департаменти ҳамда шаҳар Ички ишлар бош бошқармаси (ИИББ) билан ҳамкорликда ўтказилган тезкор тадбир давомида таълим соҳасидаги ноқонуний ҳаракатлар фош этилди.
Олиб борилган текширувлар натижасида Олмазор туманидаги мактабгача таълим ташкилоти раҳбари тадбиркорлик билан шуғулланишни истаган фуқаронинг ишончига кирганлиги маълум бўлди. У ўзининг мансабдор танишлари орқали Шайхонтўҳур туманида жойлашган тўртта умумтаълим мактабининг футбол майдонларини аукцион орқали узоқ муддатга ижара ҳуқуқи билан олиб беришга ваъда берган. Бунинг эвазига у фуқаронинг 8500 АҚШ доллари миқдоридаги пул маблағини олган вақтида ҳуқуқни муҳофаза қилувчи органлар томонидан ашё далиллари билан қўлга олинди.
Ҳозирда мазкур мактабгача таълим ташкилоти раҳбарига нисбатан Ўзбекистон Республикаси Жиноят кодексининг 168-моддаси 2-қисми «а» банди (фирибгарлик) ҳамда 28, 211-моддаси 1-қисми (пора олиш) бўйича жиноят иши қўзғатилган. Ҳозирда тергов ҳаракатлари олиб борилмоқда.
Бошқа бир ҳолатда, Қорақалпоғистон Республикасининг туманларидан бирида мактабгача ва мактаб таълими бўлими бошлиғи ўз хизмат мавқеидан фойдаланиб, ушбу бўлимнинг бош мутахассиси билан ўзаро тил бириктирган. У мактабда фаолият юритаётган ўқитувчини туман ҳудудидаги мактабгача таълим ташкилоти раҳбари лавозимига тайинлаш эвазига ундан 15 миллион сўм миқдорида пора талаб қилган. Ушбу пул маблағини бош мутахассис орқали олаётган вақтида ДХХ, Иқтисодий жиноятларга қарши курашиш департаменти ва ички ишлар органлари ходимлари томонидан қўлга олинган.
Мазкур шахсларга нисбатан Ўзбекистон Республикаси Жиноят кодексининг 168-моддаси (фирибгарлик) бўйича жиноят иши қўзғатилиб, тергов ҳаракатлари олиб борилмоқда.
Ҳуқуқни муҳофаза қилиш органлари томонидан таълим тизимидаги коррупцияга қарши курашиш ишлари давом эттирилмоқда.
