Ўқотар қуролни ихтиёрий топширганларга мукофот берилади
Қарор ноқонуний қуролларни камайтиришга қаратилган.
Ўзбекистонда рўйхатдан ўтмаган ўқотар қурол ва ўқ-дориларни ихтиёрий равишда ҳуқуқ-тартибот органларига топширган фуқаролар мукофотланади. Бу тартиб Вазирлар Маҳкамасининг 2025 йил 25 мартдаги қарори билан тасдиқланди.
Мукофот миқдори топширилган қурол турига боғлиқ бўлиб, милтиқли қуроллар учун 500% БҲМ, силлиқ қуроллар учун 400%, пневматик қуроллар учун 100%, пичоқлар учун 50% ва бошқа воситалар учун 5–30% оралиғида белгиланади. Агар топширилган қурол шикастланган бўлса, мукофот миқдори икки бараварга камаяди.
Қурол топшириш жараёни профилактика инспектори ёки тегишли идоралар орқали амалга оширилади. Ички ишлар органлари қуролни текшириб, бу ҳақда махсус квитанция беради. Ушбу чора ноқонуний қуролларни камайтириш ва хавфсизликни оширишга қаратилган.
