Наманганда 4 ёшли бола гугурт ўйнаб, ёниб кетди
Бола ертўлада ўтинларни ёқиши оқибатида ёнғин юзага келган.
Маълум қилинишича, Наманганда 3 нафар қариндошлар ертўлага тушиб, ўтин ва хашакларни ёқишган. Оқибатда ертўлада ёнғин юзага келган. Мазкур ҳолат жорий йилнинг 23 март куни Наманган вилояти Янгиқўрғон туманида содир бўлган.
Аниқланишича, ертўлада олов ичида қолган болаларнинг 2 нафари 2021 йилда, яна бири 2017 йилда туғилган.
Расмий маълумотларга кўра, 2 нафар болакай дераза орқали қутқариб қолинган. Вафот этган болакайнинг жонсиз танаси эса бобоси томонидан топилган.
Шифокорларнинг ёрдами сабаб 2 нафар боланинг ҳаёти сақлаб қолинган. Туман тиббиёт бирлашмасининг хулосасига кўра, тирик қолган болалар юз, бўйин, иккала қўл, оёқ ва сон қисмларидан куйиш жароҳатини олган.
Марҳумнинг вафотига эса тананинг 100 фоиз қисми 4- даражадаги куйиш оқибатида юзага келганлиги, тана қисмларида тўлиқ куйиш жароҳати кўрсатилган.
Мазкур ҳолат юзасидан марҳум боланинг ўлим сабабларини аниқлаш мақсадида суд-тиббий экспертизаси, унинг хонадонида содир бўлган ёнғин сабабини аниқлаш учун ёнғин техникавий экспертизаси тайинланган. Бу ҳақда Бош прокуратура Матбуот котиби Ҳаёт Шамсутдинов маълум қилди. Ҳозирда терговга қадар текширув ҳаракатлари олиб борилмоқда.
