Энди Ўзбекистон дипломлари Германияда тан олиниши мумкин
Ўзбекистон ва Германия ўртасида таълим соҳасидаги ҳамкорликни мустаҳкамлашга қаратилган учрашувлар ўтказилди.
Жорий йилнинг 1 апрель куни Ўзбекистон Республикаси Инвестициялар, саноат ва савдо вазири ўринбосари Шоҳрух Ғуломов Германиянинг таълим ва миграция соҳасидаги мутахассисларидан иборат делегация билан учрашди. Учрашувда Ўзбекистон ва Германия ўртасидаги ҳамкорликни янада ривожлантиришга қаратилган бир қатор истиқболли йўналишлар муҳокама қилинди.
Учрашувда делегация таркибида Германиянинг ҳудудий савдо-саноат палаталари директорларидан, шунингдек, ГП Гüнтер Папенбург АГ компанияси томонидан ташкил этилган инвестиция компаниялари раҳбарларидан иборат вакиллар иштирок этди. Улар, икки томонлама алоқаларни кучайтириш ва иқтисодий ҳамкорликни кенгайтириш бўйича таклифлар билдирган.
Асосий муҳокама қилинадиган масалалар орасида:
Ўзбекистон ёшларини илғор технологияларни ўргатиш ва кейинчалик уларни Германия корхоналарида ишга жойлаштиришни назарда тутувчи қўшма лойиҳалар амалга оширилиши;
Германиялик мутахассисларга Ўзбекистонда меҳнат фаолиятини амалга ошириш учун имтиёзлар бериш;
Ўзбекистон дипломларининг Германияда тан олиниши ҳамда Ўзбекистон олий таълим муассасалари ва касб-ҳунар коллежларининг Германия Таълим вазирлигининг АНАБИН маълумотлар базасига киритилиши муҳокама қилинди.
Шунингдек, Германияда ўзбек мутахассисларига ва ёшларига имкониятлар яратиш, икки мамлакат ўртасидаги меҳнат миграцияси ва инвестиция соҳасидаги ҳамкорликни кенгайтириш масалалари ҳам кўриб чиқилди.
