Ўзбекистонда ёқилги-энергия ресурслари устидан назорат кучайтирилади
Туманларда энергия самарадорлигини ошириш бўйича ишчи гуруҳлар ташкил этилади.
Президент Шавкат Мирзиёевнинг “Ёқилги-энергия ресурсларидан ноқонуний фойдалаш ва беҳуда сарфланишининг олдини олиш ҳамда энергия самарадорлигини ошириш бўйича чора-тадбирларни такомиллаштириш тўғрисида”ги қарори асосида, Ўзбекистонда ёқилги-энергия ресурслари устидан назорат кучайтирилади.
Қарор бўйича, туманларда электрон платформаларни янгилаш ва ишчи гуруҳлар тузиш режалаштирилган. Ҳар бир туман (шаҳар)да энергия балансини ишлаб чиқиш ва самарали бажарилиши, шунингдек, энергия тежаш дастурларини амалга оширишга оид туман (шаҳар)лараро идора гуруҳлари ташкил этилади. Бу гуруҳларнинг бошлиқлари туман (шаҳар) прокурорлари бўлади.
Қарорнинг асосий йўналишлари қуйидагиларни ўз ичига олади:
Ёқилги-энергия ресурсларидан фойдаланувчи давлат назоратини самарали ташкил этиш ва мувофиқлаштириш бўйича умумий ва ҳудудий штабларга қўшимча вазифалар юкланади;
Туман (шаҳар)лардаги идора-гуруҳларнинг устувор вазифалари ва фаолият йўналишлари тасдиқланади;
Ҳар бир туман (шаҳар)да энергия ресурсларини тежаш ва тармоқлардаги йўқотишларни камайтириш бўйича режалар асосида назорат амалга оширилади.
Шу билан бирга, Бош прокуратура ва Энергетика вазирлиги ҳамда бошқа давлат ташкилотлари, жумладан, Рақамли технологиялар вазирлиги, Ўзенергоинспекция, Божхона қўмитаси, Солиқ қўмитаси билан биргаликда икки ой муддатда назорат ва мониторинг имконини берувчи электрон платформаларни такомиллаштиради. Вазирликлар ва бошқа ташкилот раҳбарлари эса энергия тежаш кўрсаткичларини платформаларда мунтазам акс эттириб бориш ва бу маълумотларнинг ҳақиқийлигига жавобгар бўлади.
