Тошкент вилоятида боғча тарбиячиси болаларни калтаклади
Тарбиячи билан тузилган меҳнат шартномаси бекор қилинган.
Ижтимоий тармоқларда Тошкент вилоятидаги боғчалардан бирида тарбиячининг болаларни калтаклаётгани акс этган видео тарқалиб, жамоатчилик орасида кенг муҳокамаларга сабаб бўлди. Ҳолат юзасидан Тошкент вилояти Мактабгача ва мактаб таълими бошқармаси расмий баёнот берди.
Аниқланишича, воқеа жорий йилнинг 2 апрель куни Нуробод шаҳридаги хусусий оилавий боғчада содир бўлган. Мазкур боғчада ишлаётган тарбиячи M.M. машғулот жараёнида болаларга нисбатан қўпол муносабатда бўлган. Уни боғча раҳбари видеокузатув камералари орқали аниқлаган.
Натижада тарбиячи билан тузилган меҳнат шартномаси бекор қилиниб, у иш жойидан бўшатилган. Айни пайтда ҳолат юзасидан шаҳар ички ишлар бўлими томонидан суриштирув ишлари олиб борилмоқда.
