АҚШ ва Ўзбекистон стратегик шерикликни мустаҳкамлашни муҳокама қилди
АҚШ Ўзбекистон билан инвестиция ва хавфсизлик соҳаларида ҳамкорликни кенгайтирмоқчи.
Жорий ҳафтада АҚШнинг пойтахти Вашингтон шаҳрида бўлиб ўтган учрашувда АҚШ Давлат котиби ўринбосари Кристофер Ландау ва Ўзбекистон Миллий хавфсизлик кенгаши раиси ўринбосари Абдулазиз Комилов икки давлат ўртасидаги стратегик шерикликни мустаҳкамлаш масалаларини муҳокама қилишди.
АҚШ Давлат департаменти матбуот котиби Темми Бруснинг баёнотига кўра, Кристофер Ландау АҚШ ҳукумати номидан Ўзбекистоннинг мустақиллиги, суверенитети ва ҳудудий яхлитлигини доимий қўллаб-қувватлашини яна бир бор таъкидлади. Учрашув икки давлат ўртасидаги ишончли сиёсий мулоқот юқори даражада давом этаётганини кўрсатади.
Шунингдек, Ландау Ўзбекистоннинг фуқаролик атом энергетикаси, муҳим фойдали қазилмалар ва иқтисодиётнинг бошқа йўналишларидаги инвестиция салоҳиятини юқори баҳолади. У АҚШ ушбу соҳаларда ҳамкорликни кенгайтиришга катта қизиқиш билдираётганини айтди.
Бундан ташқари, Ландау АҚШнинг Ўзбекистон билан ноқонуний миграция ва терроризмга қарши курашишдаги ҳамкорлигини алоҳида эътироф этди ва бу йўналишдаги доимий ҳамжиҳатлик учун миннатдорлик билдирди.
