Қўлбола усулда ёғ ишлаб чиқариш цехлари фош этилди
Ҳолат юзасидан тергов ҳаракатлари бошланган.
Сурхондарё ва Қашқадарё вилоятларида ноқонуний равишда ёғ ишлаб чиқараётган яширин цехлар аниқланди. Бош прокуратура ҳузуридаги Департамент томонидан ўтказилган тезкор тадбирлар чоғида қўлбола усулда маҳсулот тайёрланаётгани маълум бўлди.
Сурхондарёда «Б.» МЧЖ раҳбари ўз хонадонида яширин цех ташкил этиб, чигитдан ёғ тайёрлаётгани фош этилди. Унинг уйидан 2,6 тонна чигит, 2 тонна ёғ, 40 литрлик идишлар ва ишлаб чиқаришда фойдаланилган бошқа воситалар ашёвий далил сифатида олинди.
Қашқадарёда эса Чироқчи туманида яшовчи фуқаронинг хонадонида ҳам шундай қонунбузарлик аниқланди. У жувоз ускунасида 114 литр ёғ ва 262 кг чигит тайёрлаган. Шунингдек, 3 та двигатель, 5 та 200 литрлик идиш ва бошқа ускуналар мусодара қилинди.
Ҳар иккала ҳолат юзасидан Жиноят кодексининг 186-2-моддаси бўйича жиноят иши қўзғатилиб, тергов ҳаракатлари бошланган.
