Тошкентда мактаб директори ва ота-она жанжаллашди
Ҳолат юзасидан ММТБ расмий муносабат билдирди.
Ижтимоий тармоқда Тошкент шаҳрининг Миробод туманидаги 213-мактабда директор ва ота-оналар жанжали акс этган видео тарқалганди. Ҳолат юзасидан расмий маълумот берилди.
Аниқланишича, Миробод тумани Қўйлиқ ота маҳалла фуқаролар йиғинида истиқомат қилувчи К. Ф. 213-мактабда ўқимаслигига қарамай бир неча марта мактабга кириб, ўртоқларининг дарсда ўтиришига халақит берганлиги учун мактаб директори И. С. уни таълим муассасаси ҳудудидан чиқариб юборган. 7 апрель куни кўп маротаба огоҳлантирилишига қарамай, К. Ф. яна мактаб ҳудудида дарс вақтида собиқ синфдоши билан учрашган. Бунинг гувоҳи бўлган директор К. Ф. билан гаплашиб турган унинг тенгдоши 10-синф ўқувчиси А. га танбеҳ берган.
Шу куни К. Ф. нинг отаси турмуш ўртоғи билан мактаб директори кабинетига бостириб кирган. “Баратхўжа” МФЙ маҳалла профилактика инспектори А. Д. нинг бир неча марта огоҳлантиришига қарамай, улар директорга ҳурматсизлик қилиб, сўкиб, туҳмат гаплар билан ҳақорат қила бошлашган. Бундан асабийлашган мактаб директори И. С. ота-онани ўз хонасидан чиқиб кетишларини талаб қилган.
Содир бўлган воқеадан сўнг директор фуқаронинг хатти-ҳаракатлари юзасидан унга нисбатан қонуний чора кўрилишини сўраб ички ишлар идораларига ариза билан мурожаат қилган.
