Тошкентда алимент тўламай яшириниб юрган эркак қўлга олинди
Алиментдан қочган ота девор ортидан топилди.
Тошкент шаҳри Яшнобод туманида уч нафар фарзандини моддий таъминлашдан бўйин товлаган ота узоқ муддатли қидирувдан сўнг ўз уйининг ташқи девори ортидан топилди. Бу ҳақда Мажбурий ижро бюроси шаҳар бошқармаси хабар берди.
Маълум қилинишича, М. Улуғбек туманлараро судининг қарорига асосан N.H. исмли эркакдан Sh.H. фойдасига уч нафар вояга етмаган фарзандининг таъминоти учун ярим улуш миқдорида алимент ундириш белгиланган. Аммо у 2024 йил апрель ойидан буён алимент тўлашдан бош тортиб, яшириниб юрган.
Қидирув тадбирлари натижасида у яширин равишда яшаётган жойи — уйининг деворлари орасида аниқланиб, қўлга олинган. Унга нисбатан ҳужжатлар расмийлаштирилиб, Ўзбекистон МЖтКнинг 47-1-моддасига асосан судга юборилган.
Суд қарори билан унга 15 суткалик маъмурий қамоқ жазоси тайинланган. Орадан кўп ўтмай, унинг қариндошлари томонидан 54 миллион 562 минг сўмлик алимент қарзи тўлиқ қоплаб берилган.
