Ўзбекистонда ўғит ва кимёвий воситалар рақамли маркировкаланади
Лойиҳа 2025 йил 1 майдан расман ишга тушади.
2025 йил 1 майдан Ўзбекистонда минерал ўғитлар ва ўсимликларни ҳимоя қилувчи кимёвий воситаларни рақамли маркировкалаш бўйича тажриба лойиҳаси бошланади. Бешта маҳаллий ва халқаро компания пилот дастурда иштирок этади. Бу жараён 2026 йил 1 майдан мажбурий тартибда жорий этилади.
Маркировкалаш тизими маҳсулотнинг ҳақиқийлигини аниқлаш, контрабанда ва контрафактга қарши курашиш мақсадида амалга оширилади. Қамраб олинадиган маҳсулотлар қаторида азотли, фосфорли, калийли ўғитлар, инсектитсидлар, гербицидлар ва бошқа кимёвий воситалар бор.
Вазирлар Маҳкамаси томонидан лойиҳани амалга ошириш тартиби белгилаб берилди. Мазкур ташаббус рақамли назорат механизмларини қишлоқ хўжалигида кенг жорий этиш йўлидаги қадам сифатида баҳоланмоқда.
