Қашқадарёда тарбиячи болага тасодифан қайнаган сув тўкиб юборди
Ҳолат юзасидан прокуратура томонидан текширув бошланган.
Қашқадарё вилояти, Ғузор туманидаги 4-сонли давлат мактабгача таълим ташкилотида тарбиячи аёл тасодифан қайнаган сувни болага тўкиб юборган. Оқибатда бола тан жароҳати олган ва зудлик билан тез тиббий ёрдамга етказилган.
Вилоят Мактабгача ва мактаб таълими бошқармаси маълумотига кўра, воқеа тушлик вақтида болаларни ичкарига олиб кириш жараёнида юз берган. Тарбиячи Sh.Y. ва тарбияланувчи N.M. тасодифан тўқнашиб кетган, натижада қайноқ сув боланинг пешона ва чап ёноқ қисмига тўкилган.
Бола дарҳол ДМТТ ҳамшираси томонидан бирламчи тиббий ёрдам олган ва шундан сўнг отаси чақирилиб, тез ёрдам машинасида Ғузор туман тез тиббиёт бирлашмасига олиб борилган. Тиббий муассасада керакли чоралар кўрилган.
Тиббиёт бирлашмаси маълумотига кўра, бола ва унинг отаси кейинроқ шифохонани ўз хоҳишига кўра тарк этган. Боланинг соғлиғи тезроқ тикланиши учун ДМТТ томонидан молиявий ёрдам ҳам кўрсатилган.
Ҳозирда бепарволикда айбланаётган ташкилот ходимларига нисбатан хизмат текшируви ўтказилмоқда. Шунингдек, Ғузор туман прокуратураси ҳам воқеани қонуний тартибда ўрганмоқда. Натижалар ҳақида қўшимча маълумот берилиши айтилган.
Вилоят Мактабгача ва мактаб таълими бошқармаси баёнотида “Педагог шаънига доғ тушираётган, ўз вазифасига лоқайдлик билан қараётган ҳар қандай хатти-ҳаракат кескин қораланиши” айтиб ўтилган.
