Саида Мирзиёева анимация студиялари вакиллари билан учрашди
Учрашувда соҳани ривожлантириш бўйича таклифлар билдирилди.
Президент ёрдамчиси Саида Мирзиёева етакчи анимация студиялари вакиллари билан учрашиб, болалар учун миллий контент яратиш масалаларини муҳокама қилди. У фарзандларимиз томоша қилаётган контентнинг катта қисми чет эл маҳсулотлари эканини таъкидлаб, «Доноча» каби маҳаллий лойиҳаларни қўллаб-қувватлаш зарурлигини билдирди.
Учрашув давомида анимация соҳаси вакиллари ўз лойиҳалари, дуч келаётган муаммолар ҳамда соҳани ривожлантириш бўйича таклифларини билдирдилар. Саида Мирзиёева болалар учун ўзбек тилидаги қўшиқлар, миллий қадриятларга асосланган мултфилмлар ва таълимий контентлар етишмаслигини айтиб, бу йўналишни янада ривожлантириш кераклигини қайд этди.
Шунингдек, Мирзиёева яқинда Республика болалар кутубхонасига ташриф буюргани ҳақида ҳам сўз юритди. У кутубхонада тарихий деворий суратлар топилганини, бу ерда замонавий муҳит билан тарихий руҳ уйғунлашганини таъкидлади.
“Кутубхонамиз эшиклари барча китобсеварлар учун очиқ”, — дея ёзади президент ёрдамчиси ўз саҳифасида.
