Андижонлик эркак милтиқ билан 52 та радарни уриб синдирди
У жами 1 млрд 147 млн сўм моддий зарар етказган.
Андижон шаҳрида 52 та радар камерасига милтиқдан ўқ отган эркакка жиноий иш очилди. Бу ҳақида шаҳар Ички ишлар бошқармаси хабар берди.
1976 йилда туғилган эркак Андижон шаҳри ҳудудидаги 29 та чорраҳага ўрнатилган “TELECOM SOFT” МЧЖга тегишли бўлган 51 дона фото ва видео қайд қилиш дастурий-техник воситалари ва 1 дона «Ҳиквисион» русумли радар комплексига, ўзига тегишли бўлган “SRKET” русумли пневматик милтиқдан ўқ отиш орқали қасддан шикаст етказиб, жами 1 млрд 147 млн сўм моддий зарар етказган.
Мазкур ҳолат юзасидан ЖКнинг 173-моддаси 2-қисми “v” банди билан жиноят иши қўзғатилиб, тергов ҳаракатлари олиб борилмоқда.
