“Андижон турмаси” шаҳар марказидан чеккага кўчади
Ҳибсхона ўрнида кўнгилочар марказлар қурилади.
Андижон шаҳрининг марказида жойлашган “Андижон турмаси” — 3-сон тергов ҳибсхонаси шаҳарнинг чекка ҳудудига кўчирилади. Бу ҳақда Андижонга ташриф буюрган давлат раҳбари маълум қилди.
Президент ушбу иншоот 100 йил аввал қурилганини ва бугунги кунда шаҳар марказида унинг мавжудлиги ножоиз эканини таъкидлади. Шаҳар тобора ободонлашиб, замонавий кўринишга кириб бораётган бир вақтда, “бундай совуқ бинонинг” марказда жойлашганини номақбул деб топди.
Мазкур қарорга кўра, ҳибсхона бошқа ҳудудга кўчирилади, унинг ўрнида эса замонавий кўнгилочар, савдо ва сервис маркази барпо этилиши режалаштирилмоқда.
