Трамп Украинага қурол сотишни рад этди
У ҳатто 50 миллиардлик таклифни ҳам қабул қилмади.
АҚШ президенти Доналд Трамп Украинага ҳаттоки пул эвазига ҳам қурол-яроғ етказиб беришдан бош тортди. Украина Президенти Владимир Зеленский АҚШдан «Патриот» ҳаво ҳужумидан мудофаа тизимлари ва юзлаб ракеталарни харид қилиш учун 50 миллиард доллар ажратишга тайёрлигини билдирган эди. Аммо Трамп бу таклифга салбий жавоб берди.
Трамп журналистларга берган интервьюсида шундай деди: “Зеленский доим ракета сотиб олмоқчи. Аммо сиз уруш бошлаётган бўлсангиз, уни ютишга қодир эканингизга ишонишингиз керак. Рақибингиз сиздан 20 баробар кучли бўлса, ва сиз фақат бошқалардан ракета кутаётган бўлсангиз – бу нотўғри ёндашув”. Бу баёнотлар Трампнинг Россия билан музокараларни афзал кўришини яна бир бор кўрсатди.
Украинада Трампнинг позицияси кескин норозилик билан кутиб олинди. Мамлакатдаги сиёсий фаоллар ва халқаро кузатувчилар бу қарорни қон тўкилишини давом эттиришга имкон берувчи омил деб ҳисобламоқда. Таҳлилчилар эса Трампнинг бу қарори унинг сайловолди кампанияси ва изоляцион сиёсатга содиқлигини акс эттираётганини таъкидлашмоқда.
