Яманда ҳусийлар АҚШни ҳаво ҳужумида айбламоқда
Ҳужум натижасида портда ишлаётган 17 киши ҳалок бўлган.
AFP агентлиги маълумотига кўра, Ямандаги ҳусийлар АҚШ Қизил денгиз бўйида жойлашган Рас Иса портига ҳаво ҳужумлари уюштирганини маълум қилди. Ҳусийлар вакили Анис Аласабаҳи баёнотига кўра, ҳужум натижасида портда ишлаётган 17 киши ҳалок бўлган, яна 30 нафар инсон жароҳат олган.
АҚШ Қуролли Кучлари Марказий Қўмондонлиги (CENTCOM) эса бу ҳаво зарбалари ҳусийларнинг ёқилғи таъминотини чеклаш ва ноқонуний даромад манбаларини йўқ қилиш мақсадида амалга оширилганини таъкидлади. Баёнотда қайд этилишича, ҳусийлар бу манбалар орқали ўн йилдан ортиқ вақт мобайнида террорчилик фаолиятларини молиялаштириб келган.
CENTCOMъга кўра, АҚШ ҳукумати ҳусийларни жорий йил бошида “хорижий террористик ташкилот” деб эълон қилган бўлсада, улар Рас Иса порти орқали ёқилғи етказиб беришда давом этган. Бу эса минтақадаги хавфсизликни янада издан чиқариши мумкинлиги қайд этилмоқда.
