Зеленский Хитойни Россияга қурол етказишда айблади
Россия тарафида жанг қилган Хитой фуқароси Украинада асирга олинган.
Украина президенти Владимир Зеленский Хитойни Россияга қурол етказиб беришда айблади. Унинг сўзларига кўра, Украина Хавфсизлик хизмати ва разведка маълумотлари Хитойнинг Россия армиясига порох ва артиллерия воситалари билан ёрдам бераётганини кўрсатмоқда.
Зеленский "Интерфакс-Украина" агентлигига берган баёнотида, келгуси ҳафталарда бу борадаги маълумотларни кенгроқ ошкор қилиш режалаштирилаётганини айтди. У, шунингдек, Хитой вакиллари Россия ҳудудида қурол ишлаб чиқариш билан шуғулланиши мумкинлигига урғу берди.
Расмий Пекин эса Россия-Украина урушида бетарафлик позициясини сақлаб келмоқда ва томонларни музокаралар орқали можарони тугатишга чақирган. Хитой Россияга қарши халқаро санкцияларни қўллаб-қувватламаган.
Шунингдек, апрель ойининг бошида Россия томонида жанг қилган икки нафар Хитой фуқароси Украина томонидан асирга олингани маълум бўлди. Пекин бу шахслар урушга хусусий шахс сифатида аралашганини ва Хитой расмийлари фуқароларни урушдан тийилишга чақирганини қайд этди.
