Хонанда Райҳон жаримага тортилди
У муаллифлик ҳуқуқини бузганликда айбланди.
Адлия вазирлиги томонидан ўрганилган ҳолатга кўра, машҳур хонанда Райҳон Ғаниева ва «Саҳар» гуруҳи солисти Анвар Жўраев муаллифлик ҳуқуқини бузганликда айбланди. Маълум бўлишича, улар шоир Шохрух Абдувоҳидовга (Абдуссамий тахаллуси) тегишли «Яхшимасми» ва “Эрта бормизми” номли шеърларни муаллиф рухсатисиз қўшиқларда ишлатган.
Мазкур мурожаат Муаллифлик ва турдош ҳуқуқларни ҳимоя қилиш жамоат бирлашмаси томонидан Адлия вазирлигига юборилган. Текширув давомида шеърлар матни муаллифнинг розилигисиз ижро этилгани аниқланган.
Ҳолат юзасидан Маъмурий жавобгарлик тўғрисидаги кодекснинг 177-1-моддаси асосида баённомалар тузилиб, тегишли судга юборилган.
Тошкент шаҳри Яшнобод туман суди қарорига кўра, Райҳонга 750 минг сўм (базавий ҳисоблаш миқдорининг 2 баравари) миқдорида жарима жазоси тайинланди.
