Тошкентда бир нечта машинани уриб юборган аёл қамалди

Қайд этилишича, 19 апрель куни фуқаро O.Ж. отаси номида бўлган Gentra русумли автомашинани таниши — ҳайдовчилик гувоҳномасига эга бўлмаган С.П.гa бошқариш учун тақдим қилиб, ўзи автомашинанинг олди йўловчи ўриндиғида келган, орқа ўриндиғида уч нафар уларнинг танишлари бўлган.

 

Улар Чилонзор тумани ТХАЙ-Чорбоғ кўчасида тартибсиз ҳаракатланиб, дастлаб Damas русумли автомашинани уриб юбориб, шикаст етказган.

 

Шунда ушбу йўналишда хизмат олиб бораётган ЙҲХБ ходимлари уларга тўхташ буйруғини берган бўлсада, С.П. бунга бўйсунмасдан, О.Ж.нинг кўрсатмаси бўйича ҳаракатни давом эттирган. Натижада у Cobalt ва 2 та Gentra русумли автомобиллар билан тўқнашув содир қилиб, ҳайдовчиларга тан жароҳати ва автомашиналарга шикаст етказган, сўнг Matiz русумли автомашина (жами 5 та автомашина) билан тўқнашув содир қилиб, бошқарувни тўхтатган.

 

Мазкур ҳолат юзасидан жиноят иши қўзғатилиб, ҳозирда фуқаролар С.П. ва О.Ж. нисбатан Жиноят кодексининг 173-моддаси 2-қисми “б” банди (ўзганинг мулкига шикаст етказиш) ва 277-моддаси 3-қисми “г” банди (безорилик) билан айб эълон қилиниб, “қамоққа олиш” тарзидаги эҳтиёт чораси қўлланилди.

 

Ўз навбатида, автоуловни орқа ўриндиғида келган фуқаролар П.Г., Қ.Д., Р.Б. жамоат жойида майда безорилик ва ички ишлар органларининг қонуний талабларини бажармаганлиги ҳамда ҳаракатларида жиноят аломатлари бўлмаганлиги сабабли уларга Маъмурий жавобгарлик тўғрисидаги кодексининг 183 ва 194-моддалари асосида 7 сутка маъмурий қамоқ жазоси тайинланган.