Шукрулло Исроиловнинг кўрсатмадаги “ҳазили”
Шукрулло Исроиловнинг машинасини олиб қочган шахсга суд ҳукми ўқилди.
Куни кеча, жиноят ишлари бўйича Мирзо Улуғбек туман судида транспорт воситасини олиб қочишда айбланаётган шахсга нисбатан жиноят иши кўриб чиқилди.
Айбланувчи ўз кўрсатмасида айбига тўлиқ иқрор эканлигини билдириб, бу хатти-ҳаракатини транспорт воситаларга қизиқиши билан изоҳлади.
Судланувчи — 1998 йилда туғилган фуқаро Х. Ш. С нинг Тошкентга келганига 3 йилдан ошган, туғма 2-гуруҳ ногирони, ҳозирда вақтинча ишсиз ҳисобланади. Бугунги кунгача Олмазор туманидаги “Ягона оила” номли меҳмонхонада яшаб келган.
2025 йил 19 март куни у таниши билан учрашиш мақсадида Мирзо Улуғбек туманига келган ва кўчада айланиб юрганида Mercedes-Benz GLS 500 русумли автотранспорт воситасини кўриб қолиб, унинг олдида селфи қилиб расмга тушган. Шундан сўнг автомобил очиқ ҳолда қолдириб кетилгани, калит жойида эканини кўриб, уни ҳайдагиси келиб қолган ва автомобилни шунчаки айланиб келиш мақсадида ҳайдаб кетган.
Транспорт воситаси йўл патрул хизмати ходимлари томонидан Тошкент шаҳри, Учтепа тумани, Заргарлик кўчасида тўхтатилган.
Шукрулло Исроилов ички ишлар органлари ходимларига берган кўрсатмасида автомобил ўзиники эканлигини ва рулда ҳам ўзи бўлганини билдирган.
Аммо, судда унинг номидан қатнашган ўғли, автомобил ҳужжатларда унинг номида эканлигини ва рулда отаси эмас, ўзи бўлганини айтиб, отасининг гапини инкор қилган.
Бу кўрсатмаларга қарамай суд айбдорни аниқлаб, Исроиловлар оиласига тегишли Mercedes-Benz автомобилини ўғирлаб кетган йигитни суд ҳукми билан 2 йил муддатга озодликдан маҳрум қилди.
