Тошкентда шоколад музейи очилди

Тошкентдаги Наврўз боғида Марказий Осиёдаги илк шоколад музейи фаолиятини бошлади. Музейда шоколад санъати ва тарихига оид экспонатлар намойиш этилмоқда. Музейда Ўзбекистон ва дунёнинг машҳур меъморий ёдгорликларининг шоколадли миниатюралари, шунингдек, тарихий шахсларнинг ҳайкаллари мавжуд.

 

Музейда жами 19 та экспонат бўлиб, улардан 16 таси усталар томонидан қўлда ясалган шоколадли ҳайкаллардир. Музейда ишлатилган шоколаднинг умумий оғирлиги 850 килограммни ташкил этади, ва улар 35°С гача бўлган ҳароратда сақланиши мумкин. Экспонатлар орасида Колизей, Тож Маҳал, Пиза минораси каби дунё архитектурасининг энг машҳур иншоотлари ва Ўзбекистоннинг тарихий обидалари мавжуд.

 

Музейнинг очилиш мақсади – миллий маданият ва тарихни шоколад санъати орқали намойиш этишдир. Ҳозирги вақтда музейга кунига 100 га яқин одам ташриф буюрмоқда. Шунингдек, музейда шоколад ишлаб чиқариш жараёни ҳам намойиш қилинади.

 

Музейда барча экспонатлар ҳақида маълумотлар ўзбек, рус ва инглиз тилларида тақдим этилган. Келажакда музейда шоколад маҳсулотларини тайёрлаш бўйича маҳорат дарслари ташкил этилиши режалаштирилган. Музей дам олиш кунларисиз соат 9:00 дан 18:00 гача ишлайди.