Ҳиндистон Покистон авиакомпаниялари учун ҳаво ҳудудини ёпди
Ушбу чеклов Покистонга катта таъсир кўрсатмайди.
Ҳиндистон 30 апрелдан 23 майгача Покистон авиакомпанияларига ўз ҳаво ҳудудидан фойдаланишни тақиқлади. Бу қарор Покистон Ҳиндистон самолётларига ҳудудини ёпиб қўйганидан ва яқинда Кашмирда 26 кишининг ҳаётига зомин бўлган ҳужумдан сўнг қабул қилинди.
Покистон Бош вазири Шеҳбаз Шариф АҚШ Давлат котиби Марко Рубио билан суҳбатда Ҳиндистоннинг айбловларини қатъиян рад этди ва мустақил тергов ўтказишга чақирди. Шунингдек, у АҚШни Ҳиндистонни эҳтиёткорлик билан ҳаракат қилишга ундашга чақирди.
Покистон миллий авиакомпанияси — PIA — кескинлик кучайгани сабабли Ҳиндистон ҳудудидан айланиб учиш қарорини қабул қилди. Таъкидлаш жоизки, ушбу чеклов Покистонга унчалик катта таъсир кўрсатмайди, чунки Ҳиндистон ҳаво ҳудудидан асосан халқаро йўналишларда, масалан, Куала-Лумпурга парвозлар учун фойдаланиларди.
Кашмирдаги можаро туфайли икки давлат ўртасидаги муносабатлар ёмонлашиб, ҳатто сув шартномалари ва бошқа ҳамкорлик соҳаларига ҳам таъсир қила бошлади.
