Ҳиндистонда ари ҳужуми туфайли Суперкубок ўйини тўхтатилди

Ҳиндистонда бўлиб ўтган Суперкубок чорак финалида ноодатий воқеа юз берди. “Мумбай Сити” ва “Интер Каши” учрашуви пайтида майдонга катта галада асаларилар бостириб кирди. Ўйиннинг 28-дақиқасида стадионнинг юқори қисмида пайдо бўлган асаларилар туфайли ҳакамлар ва футболчилар ўйинни вақтинча тўхтатишга мажбур бўлди.

 

Қисқа танаффусдан сўнг ўйин давом эттирилди, бироқ орадан бироз ўтиб асаларилар қайтиб келиб, майдондагиларга ҳужум қилди. Вазият шу қадар кескинлашдики, трибунадаги мухлислар стадионни тарк этди, ҳакамлар эса ҳўл сочиқлар билан юзларини ёпиб, ерга ётишга мажбур бўлишди.

 

Ҳакамлар вазиятни қўлга олиш учун ноодатий қарорга келишди. Улар сариқ либосларини қора рангга алмаштиришди. Ушбу қадам асалариларни чалғитди ва ўйин давом эттирилди. 44-дақиқада учрашув 14 дақиқа компенсация билан қайта бошланди.

 

Натижада “Мумбай Сити” жамоаси 1:0 ҳисобида ғалаба қозониб, ярим финалга йўл олди.