Тошкентда ишлаб чиқариш цехи ёниб кетди
Ҳодиса оқибатида жароҳатланганлар йўқ.
1 май куни эрталаб Тошкент шаҳрининг Яккасарой туманида жойлашган синтифон ишлаб чиқариш цехида ёнғин содир бўлди. Бу ҳақда Фавқулодда вазиятлар вазирлиги матбуот хизмати хабар берди.
Маълумотларга кўра, ёнғин соат 07:01 да бошланган. Қутқарувчилар томонидан 07:45 да ёнғин қуршаб олинган ва 08:09 да тўлиқ ўчирилган. Ҳодиса оқибатида тан жароҳати олганлар ҳақида ҳеч қандай хабар келиб тушмаган.
Эслатиб ўтамиз, бундан уч кун аввал, 28 апрель куни Тошкентнинг Миробод туманидаги қурилиш маҳсулотлари сақланаётган омборхонада ҳам ёнғин содир бўлганди. Ушбу ҳолатда омборхонанинг тахминан 500 квадрат метрлик майдони ёнғиндан зарар кўрган.
