Трамп Эрон нефтини сотиб олганларга санкция қўллайди
Эрон асосан Хитойга нефть етказиб берган.
АҚШ президенти Доналд Трамп Эрондан нефть ёки нефть-кимё маҳсулотлари сотиб оладиган давлатлар ва шахсларга нисбатан иккиламчи санкциялар жорий этилишини эълон қилди. Трампнинг сўзларига кўра, бу давлатлар бундан кейин АҚШ билан ҳеч қандай шаклда бизнес қила олмайди. У барча мамлакатларни Эрон нефтини харид қилишни дарҳол тўхтатишга чақирди.
Эслатиб ўтамиз, 2024 йил апрелида Эрон нефть экспорти сўнгги олти йилдаги энг юқори кўрсаткичга чиқиб, асосан Хитойга етказиб берилган эди.
Апрель ойи ўрталарида Уммонда АҚШ ва Эрон ўртасида ядровий дастур бўйича музокараларнинг биринчи раунди бўлиб ўтди.
Маълумот учун, 2015 йилда Буюк Британия, Германия, Хитой, Россия, АҚШ, Франция ва Эрон ўртасида имзоланган ядровий битим Эрон ядро дастурига чекловлар эвазига санкцияларни юмшатишни назарда тутган. Аммо АҚШ Трамп президентлиги даврида — 2018 йил май ойида бу келишувдан чиқиб, санкцияларни қайта жорий қилган. Эрон эса бунга жавобан келишувдаги мажбуриятларини босқичма-босқич камайтирган.
