Японияда илон сабаб поездлар икки соатга тўхтади

Япониянинг машҳур "Синькансен" тез юрувчи поездлари Токио ва Осака ўртасидаги энг банд йўналишда кутилмаган тўхталишга дуч келди. Сабаби — бир метр узунликдаги илон электр симларига ўралиб қолиб, қисқа туташув юзага келтирган. ББС хабар беришича, илон устун бўйлаб юқорига судралиб чиққан ва симлар устидан ўтишга уринганида нобуд бўлган.

 

Ҳодиса чоршанба куни соат 17:00 атрофида Майбара ва Гифу-Ҳашима станциялари ўртасида содир бўлди. Йўловчиларнинг айтишича, поездларда чироқлар ва кондиционерлар ишлаган, бироқ поездлар ҳаракатланмаган.

 

Кёдо агентлиги маълумотига кўра, Токио вокзалидаги чипта автоматлари олдида узун навбатлар юзага келган. Ҳаракат соат 19:00 га келиб тикланган.

 

Таъкидлаш жоизки, ҳозир Японияда “Олтин ҳафта” деб аталувчи байрам давом этмоқда — бу даврда мамлакат бўйлаб транспорт воситалари ва вокзаллар айниқса банд бўлади.

 

Эслатиб ўтамиз, "Синькансен" Япониянинг машҳур тез юрувчи поезд тармоғи бўлиб, Токио–Осака йўналиши 1964 йилги Ёзги Олимпия ўйинларига тайёрланган. Япониянинг ушбу муваффақияти 1981 йилда Францияда биринчи ТГВ линияси ишга туширилишига ҳам туртки бўлганди. "Синькансен"лар ҳар доим ўз аниқлиги ва қулайлиги билан дунёда машҳур бўлиб келган.