Туркияда мухолифат етакчисига ҳужум қилинди
Сиёсатчилар хавфсизлиги юзасидан хавотирлар кучаймоқда.
Истанбулда Туркиянинг асосий мухолифат партияси — Жумҳурият халқ партияси (CHP) раҳбари Озгур Озел мемориал маросимдан чиқиб кетаётган пайтда ҳужумга учради. Телевизион лавҳаларда оқсочли эркак Озелга яқинлашиб, юзига мушт туширгани акс этган.
Воқеа Озел Отатурк маданият марказидаги хотира тадбиридан чиқиб кетаётганда содир бўлган. Унинг ҳужумдан кейин жароҳат олмагани айтилмоқда. Полиция 66 ёшли гумондорни қўлга олди. Маълум бўлишича, у 2004 йилда икки фарзандини ўлдириб, 2020 йилда шартли равишда озодликка чиққан.
Воқеа Туркияда сиёсатчилар хавфсизлиги ҳақидаги хавотирларни янгилади. Эслатиб ўтамиз, 2019 йилда CHP собиқ раҳбари Кемал Килисдароғлу ҳам аскар дафн маросимида ҳужумга учраган эди.
