Тошкент метрополитенида аёл машинистлар илк бор иш бошлади
Ҳозирда 16 нафар ходим ишга қабул қилинган.
Тошкент метрополитени тарихида илк бор аёллар электройўловчи поэздларни бошқарувчи машинист сифатида иш фаолиятини бошлади. Бу янгилик Россиянинг "МИР" телеканали орқали эълон қилинди ва мамлакатда гендер тенглик йўлида ташланган муҳим қадамлардан бири сифатида қаралмоқда.
Аёл машинистлар ҳозирда мураббийлар назорати остида тажриба орттирмоқда. Яқин кунларда улар таркибларни мустақил равишда бошқаришни бошлайди. Бу ташаббус ўтган йили Ўзбекистон Республикаси Президентининг топшириғига биноан эълон қилинган танлов натижасида амалга оширилди.
Танловда илгари метрополитеннинг турли бўлимларида ишлаган, зарур тажрибага эга аёллар иштирок этиб, суҳбат, тиббий кўрик ва психологик тестдан муваффақиятли ўтган 16 нафар номзод ишга қабул қилинди.
Улар 11 ой давомида интенсив ўқув курсларидан ўтиб, поездларни бошқариш қоидалари, уларнинг техник тузилиши ва пневматик тизимлар фаолияти бўйича чуқур билимларга эга бўлишди.
