Вояга етмаганларнинг карталари учун янги чекловлар киритилди
Шубҳали пул операцияларида қатнашган банк карталари блокланади.
Президентнинг 2025 йил 30 апрелдаги қарорига биноан, вояга етмаганлар учун банк карталарини очиш бўйича махсус талаблар ишлаб чиқилади. Энди банклар ота-оналарни фарзандлари билан боғлиқ шубҳали ёки фирибгарлик ҳаракатлари ҳақида хабардор қилиб бориш амалиётини йўлга қўяди. Бу эса ота-оналарга фарзандлари молиявий фаолиятини назорат қилишда ёрдам беради.
Бундан ташқари, банклар ва тўлов ташкилотлари ўз мобил иловаларига антивирус тизимларини ўрнатиб, фойдаланувчи қурилмаларида зарарли дастурлар аниқланса, мижозларни огоҳлантиришади. Шунингдек, ички ишлар органлари сўровига асосан, шубҳали пул операцияларида иштирок этган банк карталари тезкорлик билан блокланади, бу эса кибержиноятларга қарши курашиш самарадорлигини оширади.
Яна бир муҳим қадам сифатида Киберхавфсизлик маркази кибержиноятлар бўйича текширувлар натижасини баҳолаб беради. Бундан ташқари, янги ташкил этиладиган марказ эса кибержиноятларни фош этиш, тергов жараёнларидаги муаммоларни аниқлаш ва уларни бартараф этишга илмий асосланган таклифлар ишлаб чиқишга йўналтирилади.
