Жиззахда эркак 4 млн алиментни тангада тўлади
У шу орқали аёлини қийин аҳволга туширмоқчи бўлган.
Жиззах вилоятининг Шароф Рашидов туманида алимент қарздорлиги бўйича ноодатий ҳолат қайд этилди. Мажбурий ижро бюроси маълумотига кўра, бир фуқаро 4 миллион сўм миқдоридаги алимент қарзини тўлаш учун ушбу маблағни майда тангалар — 10, 50, 100 ва 500 сўмлик пулларда тўлашга ҳаракат қилган.
Маълумотларга кўра, фуқаро Л.M. собиқ турмуш ўртоғи O.Л. фойдасига фарзандини таъминлаш мақсадида суд қарори асосида алимент тўлаши лозим эди. Бироқ у белгиланган мажбуриятни бажармасдан, катта миқдорда қарздор бўлиб қолган.
Қонун талабларини англаган ҳолда, ота алиментни тўлашга розилик билдирган, аммо у бу орқали собиқ турмуш ўртоғини қийин аҳволга солишни мақсад қилганини таъкидлаган. У 4 миллион сўмлик маблағни майда тангаларга айлантириб, шахсан олиб бориб топшириш ниятида бўлган ва шу орқали алимент олувчи аёлнинг вақтини тангаларни санашга сарфлашини истаган.
Бироқ тангалар банк ходимлари билан биргаликда санаб чиқилиб, улар алимент олувчи онанинг банк картасига ўтказиб берилган.
