ЕИ Украинага 2 млрд евро мудофаа ёрдами ажратди
Бу Россиянинг музлатилган активлари ҳисобидан амалга оширилди.
Европа Иттифоқи Украинага Россиянинг музлатилган активларидан олинаётган фойда ҳисобидан 2 миллиард евро мудофаа ёрдами ажратди. Бу ҳақда "Deutsche Welle" нашри Брюсселда бўлиб ўтган ЕИ–Украина мудофаа форумида хабар берди.
Форумда, шунингдек, Киевга қурол ва ўқ-дорилар хариди учун қўшимча 900 миллион евро ажратилиши эълон қилинди. ЕИ ташқи сиёсати раҳбари Кажа Каллас Украина ҳарбий саноати билан 1 миллиард еврога тенг шартномалар имзоланганини маълум қилган эди.
Европа Иттифоқи ҳозиргача Украина мудофаа саноатини қўллаб-қувватлаш учун 3,3 миллиард евро ажратган. Брюсселдаги форумда ЕИ ва Украина ўртасида мудофаа соҳасида қўшма мақсадли гуруҳ тузилган бўлиб, у Украинани ReArm Europe дастури доирасида ЕИ саноат тизимига интеграция қилиш устида ишлайди.
