Коинотнинг охири кутилганидан анча тезроқ келади
Олимлар коинотнинг тугаш муддатини ҳисоблаб чиқишди.
Коинот абадий яшайди деган тасаввуримиз яна бир бор шубҳа остида. Нидерландиянинг Радбоуд университети олимлари томонидан олиб борилган янги илмий тадқиқотга кўра, коинотнинг йўқ бўлиб кетиши илгари ҳисоблангандан анча олдин содир бўлиши мумкин.
Нуфузли
Journal of Cosmology and Astroparticle Physics журналида эълон қилинган мақола коинотнинг узоқ умр кўриши ҳақидаги фикрларимизни қайта кўриб чиқишга ундамоқда. Тадқиқот қора туйнуклар бўйича етакчи мутахассис Хеино Фалке, физик Майкл Вондрак ва математик Валтер ван Суйлек раҳбарлигида амалга оширилди.
Улар қора туйнуклар, нейтрон юлдузлар ва Хокинг нурланиши каби мураккаб космик ҳодисаларни инобатга олган янги модель асосида ҳисоб-китоб қилишди. Натижада, коинотнинг тўлиқ йўқ бўлиши 10⁷⁸ йил ичида юз бериши аниқланган. Бу кўрсаткич илгари эълон қилинган 10¹¹⁰⁰ йиллик прогнозга нисбатан ниҳоятда қисқароқдир.
“Коинотнинг охири кутилганидан анча тезроқ бўлади, лекин хайриятки, бу ҳали ҳам жуда узоқ вақт талаб этади”,— дейди олим Хеино Фалке.
Тадқиқотчилар фикрига кўра, мавжудликни энг сўнгги тарк этадиган объектлар — оқ митти жисмлар бўлади. Қуёшга ўхшаш юлдузларнинг зич қолдиқлари бўлган бу жисмлар ҳам ниҳоят йўқ бўлиб, коинот ҳаётига якун ясайди.
Яна бир қизиқарли тафсилот: тадқиқотда Ой тақдири ҳам ҳисобга олинган. Олимларнинг аниқлашича, Ой 10⁹⁰ йил ичида бутунлай буғланади. Бу эса уни коинотдаги энг сўнгги “йўқолувчи” объектлардан бирига айлантиради.
